Pinas, nagiging land of the LAME remakes na nga ba?

Dahil sa nagtagumpay ako sa ‘king unang hangarin na may magkomento man lamang sa mga nauna kong mga isinulat, eto na naman ako at nakisipat-sipat sa mga umaatikabong pag-iisip ng liberalismo na napulot ko sa ilang taon ko sa kolehiyo. Pagsama-samahin ang konting kritikal na pag-iisip at ang popular na interes and *poof! it becomes bittercrunch!

Hindi naman kasi ako ganito kabitter noon, ewan ko. Siguro dahil sa ilang buwan kong pagkakakulong sa sulok ng aking stinky-teenage-room ay ito na at umaalingasaw na ang aking mga napupunang mga bagay-bagay.

Matagal ko ng isinuko ang hilig sa panonood ng Free TV dito sa Pinas, sukang-suka na ako mga kakornihan ng mga drama sa teleserye natin. Napakadaling hulaan ng mga mangyayari, may maghihiganti, may yayaman, ang katulong ay isa pala heredera, kapatid nya ang kanyang mahal, pilit paghihiwalayin ang magkasintahan dahil mayaman ang isa at ewan ko ba kung bakit palaging may ganoong kasamang taong nabubuhay sa katauhan ng mga kontrabida. Isa lang naman ang nakikita ko talagang dahilan kung bakit hanggang ngayon ay mayroon pa rin nito…konsumerismo ng masa sa kanilang pag-aabang ng mga artista, artista na hindi naman dahil sa talento kung bakit nasa isang palabas, ito ay dahil siya ay in demand ngayon, susunod-sunurin na ng mga kapitalista ang proyekto dahil tiba-tiba sila sa advertisement at promotion, ang mga artista naman ay di na kinakailangang mag-adjust, ang istorya mismo ang mag-aadjust sa kanila.

O sige, isa na namang reality check. Opinyon ko lamang ito mga kaibigan ha? Wala akong grudge sa mga avid fan, isang sipat nga lang.

Sa aking palagay, natural na sa mga Pilipino ang mahumaling sa mga bagay na hindi Pilipino, mahaba ang listahan kung iisa-isahin pa natin ang mga bagay na iyon, kaya hindi nakapagtataka ng ulanin tayo ng mga palabas na singkit ang mga tauhan ngunit napakagaling magsalita ng Filipino. Mukhang tatalunin na natin ang french bilang second mostly used language (exagerated). Lumabas na naman ang galing nating mga pinoy, ang mag-boses sa mga karakter ng palabas.

Tunay ngang inulan ng kasikatan ang mga palabas na ito sa unang bugso. Eto’t nakalikha pa ang iba ng konsyerto, commercial, tv guestings, nagbida pa sa ibang palabas at marami pang iba. Hindi na mabilang ang mga palabas na ito na umere sa ating mga telebisyon, hindi nakakasawa dahil malawak ang sakop ng tema, may dramatiko, may kwela, may pangkabataan, may pangbuong pamilya, ibig sabihin malawak ang saklaw ng kanyang produksyon.

Mas mura ang pagpapalabas ng mga ito kung tutuusin kaysa sa sariling gawa, malamya na nga ang TV Pilipino, lalo pa itong inagawan ng mga internasyunal na produksyon. Ngunit di pa rin tayo nahihinto sa paghumaling.

Ito na naman ang bagong trend sa TV Pilipino, ang pag-remake ng mga palabas at IPILIPINO. Nagsulputan ang mga popular na titulo ng mga palabas. Kinabaliwan, inabangan at kinainisan ng ilan.

Sabi ng propesor ko, nakakasuka na raw kung ano ang batayan ng kalidad na isinusubo sa atin ng mga kapitalistang network ng bansa. Isa sa hilig ng mga Pinoy ang panonood kaya sinasamantala nila ito sa kanilang adbentahe. Napakababa ng antas ng kalidad ng mga palabas sa TV sa ngayon. Ito ay ipinapakita ng mga telenovela sa ating bansa. Nasasayang ang galing ng mga liberal, kritikal at malikhaing pag-iisip ng mga pinoy na manunulat dahil ang pinapaboran ng mga TV Network ay ang estetika ng mga palabas at hindi ang lalim nito.

Hindi pa sila nakuntento sa pagsasa-Pilipino ng salita sa ibang palabas at eto na ngayon, ireremake nga nila ang mga palabas gamit ang mga lokal na artista.

Sandali, mukhang understatement ang naunang talata. Natatawa ako sa tuwing sinasabing PINOY VERSION lalo na sa palabas na MY GIRL mula sa popular na koreanovela na may parehong titulo. Kasi isipin nyo ba naman, Pinoy Version pero ang mga bida ay PILIPINONG HILAW, isang Tsino at Amerikano….naks! Pinoy na Pinoy Version, pinangatawanan ang pagiging melting pot ng Pinas.

Syempre, di naman ako maglalakas ng loob na isulat ito, mayroon din naman akong mga kickbacks. Ang mga forum na aking nabasa at komento sa artikulo. Di lang naman pala ako ang nakakapansin. Siguro kaya lang matindi ang pansin na iniuukol ko sa mga ganito dahil sa dinami-dami ng aking kursong kinuha sa departamentong Araling Pilipino sa Unibersidad.

Ito na naman ang paggamit ng lapit sa bawat pag-aaral. Unahin natin ang Sikolohikal na lapit. Naimpok na sa isip ng mga Pilipino ang ideya ng kolonyal na pagtangkilik. Naitaim sa isip ng mga Indio na ang mga bagay na mula sa ibang bansa ay siyang ideyal na mga bagay sa mundo, dito pinagtatalunan ang usapin sa identitad nating mga Pilipino. Mahihinuha rin ito sa sosyal na implikasyon ng mga palabas na ito, hindi lang bilang isang indibidwal ang mayroong ganitong pag-iisip ngunit ang Pilipinas bilang isang kolektibong katawan.

O sya, sige. Tumataginting pa rin naman ang mga ratings ng mga LAME na palabas na ito. Wala akong karapatang sabihang lame ang mga ito gayung di ko naman sila tinututukan. Marahil, nalalamyaan lang ako sa ideya ng remake. Kung tutuusin, napakaraming malikhaing panulat ang nandyan sa paligid, bakit hindi ito ang ipalabas? Mahirap talagang kalabang pwersa ang kapitalismo.

Bilang personal na pananaw naman. Nawawalan lamang ng lalim at tatak ang mga palabas na ginagawan ng remake. Syempre hindi aangal ang mga kompanyang may-ari nito sa ibang bansa bagkus nagiging dahilan pa ito upang magmataas sila at maliitin ang ating sariling kakayahang gumawa ng dekalidad na produksyon. Marami rin naman tayong magagandang obrang nagawa, nakakalungkot lang at di na ito nasusundan.

Nakakaasar, mas maganda pa sana dito ang kaya kong gawin, di masyado napangatuwiranan ang aking argumento, mayroon kasi akong sakit sa pag-iisip, haha. Madali akong mawalan ng interes kapag may bagong mas kainteres-interes, bwiset na youtube kasi to, NOW PLAYING : My Girl, Jokeness! haha

Isa pa sa kinaaasar ko, nabasa ko sa isang forum, ireremake daw ang FULL HOUSE! Huwaaat! Argh. Lalong titindi ang grudge ko nito.

Pasensya na dahil ako ang nagmukhang lame at hindi ang aking argumento. Tinamad na ako eh! .^^ Nakakatamad kasing pag-usan to! Babay!